Drög að árshlutauppgjöri 3. ársfjórðungs 2019 og mat á horfum til ársloka sýna að vænt afkoma félagsins er óhagstæðari en afkomuspá gerði ráð fyrir. Samkvæmt drögunum er afkoma félagsins á 3. ársfjórðungi neikvæð um 370-420 milljónir króna fyrir skatta en afkomuspá félagsins gerði ráð fyrir hagnaði fyrir skatta upp á 138 milljónir króna á sama tímabili. Ástæður eru margþættar, en þyngst vegur verri afkoma af skráðum hlutabréfum í eigu félagsins. Í ljósi fréttar sem birt var af Kviku banka um lækkun á virði fasteignasjóðs á vegum GAMMA þann 30.09. sl. upplýsist að niðurfærsla félagsins á gengi hlutdeildarskírteina í eigu þess í sjóðnum GAMMA Novus nemur 155 milljónum króna.
Miðað við fyrirliggjandi forsendur áætlar félagið að hagnaður ársins 2019 fyrir skatta verði um 2.650 milljónir króna, en afkomuspá félagsins gerði ráð fyrir hagnaði upp á 3.006 milljónir króna fyrir skatta. Félagið tilkynnir að öðru óbreyttu sérstaklega ef frávik frá væntum hagnaði ársins 2019 fyrir skatta er umfram 10%.
Uppfærð spá vegna ársins 2019 verður birt samhliða birtingu árshlutauppgjörs 3. ársfjórðungs þann 23. október næstkomandi.
Nánari upplýsingar veitir Guðný Helga Herbertsdóttir í síma 660 5191 eða [email protected].